Nusantara ngasang tanan pande randang
Indonesia ngasang rimban pande rindang
Hitu tana daku, tana de hau, tana diha,
tana dami, tana de meu, tana dise,TANA DITE
Tanah Air…ngong kuni agu kalo
Tana ba hang bara pande langkas wakar haeng ntala
Wae pande raes sake dise ame kudut waked neteng mane
Nusantara…tana ciang le di’ay, londe le bora
tana randang le adak, tana nunca le nuca
Le Mori Dedek peletn
Le Mori Ngaran du wangkan
Le Mori Jari du cain
Le Mori Kraeng haengn
Le Mori Dewan bentan
Sriwijaya wangkan salangn
Majapahit paki rami pande rahit
Budi Utomo pande moncok golo lonto
Sumpah pemuda ata uwa pande wua
Nitu main proklamasi…
Proklamasi ngong torok ba bong neteng golo
ba wenggos neteng beo
Proklamasi ngong tutung curup tu’ung pande ruku
ba mut neteng pucu
Proklamasi rani nai mai dani
Proklamasi raek wase rante
Proklami pande caca adak Blanda
Merdeka ngong weweng wase lengge pande cences
Merdeka ngong keti wase mendi pande pengki
Merdeka we’ang gerak neteng bendar
Merdeka pande bembang ngger pe’ang
Merdeka wecak nera kudut cengkad sangged lemas
Pembangunan ngong gori, gojing, getut, gejur, gempur
dempul wuku tela toni, mangan hang bara, wengko weki
neka kemba leja, kembi leis, kumba lu’ak, kambe laes, kambo lambong
kudut neki cas bantang de adak tana nusantara
dukuts sangged ruku, nipus sangged wintuk
ca kalis tuad sangged nuca
pali awon ba raos, pali salen ba raes
pali len ba res, pali laun ba rangkung
ata mesen ba sembeng, ata koen ba roes
ata boran ba bokak condo rowa
ata lengge konem ngkeleng nganceng pande mese wengke
ata becen ba pede kudut repeng
ata rucuk konem dundung nganceng ba culu pande ludung
kope oles todo kongkol, ca leleng do, do leleng ca
Kudut bambos lawo wikil langkok, munggis wikil luni
Neka po’ong hi nos bike golo, hi pijang bike niang
Hi Ndasing bike laing, hi Ndasung bike wa’u
hi Ndasang bike tana
Pat de likang sankan randang cama
Pancasila jimakn pongo kinda
UUD 1945 pingan pongo bija
NKRI pidik pande cingn ba rinding
Bhineka Tunggal Ika indangn ba ndilap pande ciar
Likang te liman, pola momang boto gomaly
Romo Ino Sutam saat membacakan puisi di lapangan Motang Rua Ruteng, Kamis 11 Mei 2017,(foto floressmart).
Mai ga ite pepil sangged celi one wekid
rapak wakar agu darad
Rokod tokod, pati ati, cahir nai, waga rak,
pande randang Nusantara, pande rindang Indonesia
kudut wake caler nggere wa, saung bembang nggere eta,
uwa haeng wulang, langkas haeng talay
Ruteng, 11 Mei 2017
Puisi ini dibacakan saat ribuan mahasiswa menggelar demonstrasi di lapangan Motang Rua Ruteng minta Ahok dibebaskan
